भारत–पाकिस्तान सीमामा भीडन्त हुँदा कम्तिमा २२ जनाको मृत्यु

कार्तिक २९ , काठमाडौँ

भारत र पाकिस्तानी सेनाबीच जम्मु–कस्मीरस्थित नियन्त्रण रेखामा शुक्रबारदेखि लगातार भीडन्त भएको छ । भीडन्तमा परी भारतका पाँच सुरक्षाकर्मी र ६ जना सर्वसाधारणको मृत्यु भएको भारतीय संचारमाध्यमहरूले जनाएका छन् ।

यस्तै पाकिस्तानतर्फ तीन कमाण्डरसहित ११ सैनिकको मृत्यु भएको बताइएको छ । पाकिस्तानी पक्षले नियन्त्रण रेखानजिक रहेको गुरेज र उरीसमेत धेरै स्थानमा गोली हानेको भारतीय सेनाले आरोप लगाएको छ । पाकिस्तानी सेनाले पनि भारतमाथि संघर्षविराम उल्लंघन गरेको आरोप लगाएको छ ।

पाकिस्तानको मुजफ्फरावादस्थित स्टेट डिजास्टर म्यानेजमेन्ट अथोरिटीले विज्ञप्ति जारी गर्दै भारतीय सेनाले नीलम र झेलम भ्यालीमा सिजफायर उल्लंघन गरेको बताएको छ ।