पुष २६, काठमाडौं
विवेकशील साझा पार्टीका अध्यक्ष रवीन्द्र मिश्रकाे एक ट्विटमा प्रतिक्रिया लेख्दै प्रधानमन्त्रीका सल्लाहकार विष्णु रिमालले सीमामा बस्न चेतावनी दिएका छन् ।
मिश्रले लेखेकाे ‘’कस्तो समय आयो ! पूर्व प्रधानन्यायाधीशहरूले विचाराधीन मुद्दामा बोल्नु पर्ने । प्रधानमन्त्री/राष्ट्रपतिले संविधान खुल्लमखुल्ला कुल्चिने । काण्डैकाण्ड गर्ने प्रधानमन्त्रीको भाषण सुन्न हजारौं जम्मा हुने । महाभ्रष्ट नेताले भ्रष्टाचारविरुद्ध र्याली आह्वान गर्दा हजारौं सरीक हुने । अब अति भो !’’ ट्विटमा रिमालले प्रतिक्रिया जनाएका हुन् ।
प्रतिक्रियामा रिमालले मर्यादा नाघ्ने जोसुकै जतिसुकै सेलिब्रेटी भएपनि त्यससँग समयले जवाफ माग्ने भन्दै सीमामा बस्न चेतावनी दिए ।
“सीमामा बस्नुस् रवीन्द्र जी ! तपाईंको यो ट्वीट टिप्पणी गर्न पनि उपयुक्त छैन ।” रिमाल लेख्छन्, ”यति चाहि भनुँ– मर्यादा नाघ्ने जोसुकै जतिसुकै सेलिब्रिटी भए पनि त्यससँग समयले जवाफ माग्ने छ ।’’
त्यसको जवाफमा रवीन्द्र मिश्रले लेखेका छन्, ”प्रिय विष्णु रिमाल जी, देशको प्रधानमन्त्रीका प्रमुख सल्लाहकारले आमरुपमा र देशका विशिष्ट व्यक्तित्वहरूले गरिरहेको टिप्पणीलाई नै दोहोर्याउँदा ‘सीमामा बस्नुस्’ भनेर धम्कीपूर्ण भाषा प्रयोग गर्नु उपयुक्त हुँदैन थियो। विमती जनाउनुभएको भए भइहाल्थ्यो । सानो सुझाव मात्र।”