क्लिनफिड पूर्णरूपमा लागू गर्न अझै धेरै चुनौती

कार्तिक १७,  काठमाडौँ

नेपालमा प्रसारण क्लिनफिड अर्थात् विदेशीविज्ञापनरहित टेलिभिजन प्रसारण नीति लागु भएको हप्तादिन नाघिसक्यो । तर वितरकहरू भने विभिन्न बहाना बनाएर विदेशी टेलिभिजन प्रसाण रोकेर बसेका छन् । एक वर्ष लामो अवधिसम्म पनि तयारी नगरेर नीति लागु भइसकेपछि प्रसारण बन्द गर्नुको अर्थ के होला ? शुल्क बढाउन सरकारसँग बार्गेनिङ ? वितरकका अनुसार क्लिनफिडका लागि प्रयोग हुने उपकरण खरिद र सञ्चालन तथा स्याटेलाइटको लागत बढ्ने भएकाले शुल्क बढाउनुपर्ने तर्क गर्छन् ।

तर अहिले क्लिन फिडका कारण कतिपय विदेशी च्यानल बन्द भएकाले तत्कालनका लागि शुल्क बढाइहाल्नुपर्ने अवस्था नरहेको कतिपयको भनाइ छ । नेपाल विज्ञापन संघका अध्यक्ष रवीन्द्रकुमार रिजाल विदेशी टेलिभिजन प्रसारणमा क्लिन फिड लागू भएपनि नेपाली टेलिभिजनबाटै डब विज्ञापन प्रसारण भइरहेकाले चुनौती बाँकी रहेको धारणा राख्छन् ।

सञ्चारविज्ञ लक्ष्मण हुमागाईँ विज्ञापन क्षेत्र अत्यन्त प्राविधिक विषय भएकाले धेरै चुनौती रहेको बताउँछन् । विज्ञापनदाता, विज्ञापन एजेन्सी, विज्ञापन कर्ममा लागेका व्यक्ति, उद्योगपति व्यापारी, र उपभोक्ता गरी पाँचवटै पक्षलाई समन्वय गर्नुपर्ने उनको तर्क छ ।

सरकारले २०७६ कात्तिक ८ गते देखि विज्ञापन नीति लागू गरेको थियो । यसलाई कार्यान्वयनमा ल्याउन एक वर्षको समय दिइएको थियो । कात्तिक ७ गते पछि क्लिनफिड लागू पनि भयो तर आवश्यक तयारी नपुगेको भन्दै अधिकांश विदेशी च्यानल बन्द गरिएका छन् । उपभोक्ताले शुल्क तिरेर पनि सेवा उपभोग गर्न पाएका छैनन् । सरोकारवाला पनि क्लिनफिड पूर्णरूपमा लागू गर्न अझै धेरै चुनौती रहेको बताउँछन् ।